Israel-Hamas indona: Inkahhai puang tura inbiaknaah Hamas tel lo

Gaza Strip-a indona a tawp theih nana inbiakna neih chu nimin khan Qatar-ah chhunzawm leh niin, Hamas tel loa neih a ni. United States leh Israel erawhin palai an tir thung.

Israel leh Hamas inkara indona a tawp theih nan hian US, Egypt leh Qatar chuan palai hna thawkin remna an zawnpui a, kumin May thla aṭang khan inkahhai puan a nih theih nan inbiakna an neihpui ṭan a ni.

Hamas hian an hotupa, Ismail Haniyeh thah a nih hnuah inbiakna aṭangin an inhnukdawk tih an sawi a, Haniyeh thah a nih hnua inbiakna neih leh hmasak berah pawh palai an tir ta lo. Hetih rual hian remna zawnga palaite chuan Qatar-a Israel an kawm zawhah Hamas hi a hrana inbiakna neihpui theih an inbeisei thung.

Qatar inbiaknaah hian US aiawhin CIA director Bill Burns leh U.S. Middle East envoy Brett McGurk te chu an tel a, Gaza-a inkahhai puang tur hian inremna an neih theih beisei mah se hun khawhral a thiang tawh lo tih an sawi. Israel hian Mossad director David Barnea, domestic security service hotu Ronen Bar leh military hostage chief Nitzan Alon te an tir ve bawk.

Inkahhai puang tura inbiakna hmawr an bawk theih loh chhanah Hamas leh Israel hian an inpuh tawn ve ve a, Hamas hian inremna tikhawtlai luiah Israel an puh laiin Israel prime minister Benjamin Netanyahu chuan Hamas hruaitu thar Yahya Sinwar chu inremna an neih theih loh chhanah a puh ve thung.

Hamas hian tun ṭum inbiaknaah hian an aiawh tir lo mahse an chief negotiator Khalil al-Hayya chu Doha-a awm a nih vang leh palai hna thawktu Egypt leh Qatar nen inzawmna ṭha an neih vangin inkahhai puang tura palai hna thawktute chuan hmasawnna thar neih ngei an inbeisei a ni.

Iran chuan Gaza-a inkahhai puan a nih chauhin Israel lakah phuba an la lo ang tia a lo sawi tawh avangin Middle East-a indona lian zawk a chhuah loh nan remna neih hi a pawimawh hle a, hemi tur hian ramdangte chuan ṭan an la mek a ni.