Africa-a monkeypox darh nasat vangin WHO-in emergency puang

World Health Organisation (WHO) chuan monkeypox (Zawng hri) vangin Nilaini khan global health emergency a puang a, hei hi kum thum chhunga a ṭum hnihna niin virus thar, inkaichhawn awlsam tak avangin Africa ramah he natna hi a darh chak hle a ni.

WHO Director-General Dr Tedros Adhanom Ghebreyesus chuan, "Mpox chi dang a lo lang leh a, Democratic Republic of Congo (DRC) leh a bulhnai ramah a darh chak hle a, a manganthlak hle a ni" a ti.

Monkeypox chi dang an hmuh chhuah thar do let tur hian khawvel ram hrang hrang an ṭanrual a ngai takzet tih WHO chuan sawiin, Africa rama he natna darh mek chu a bulṭanna chauh nia an hriat thu an sawi.

Africa-ah kar liam ta chhung khan he natna hi a darh chak em avangin Africa Centers for Disease Control and Prevention chuan emergency a lo puang tawh a, kumin chhungin DRC bikah mi 14,000 chuangin an kai tawh a, mi 524 in an thihpui tawh. Hmeichhia leh naupang kum 15 hnuai lam chu a tuar nasa zual an ni.

Moneykeypox hi virus chi hnih I leh II neia ngaih ṭhenhran ṭhin ni mah se a dang, lb chu hmuh thar niin inkaidarh a awlsam bik hle. Kum 2022 khan khawvel ram 70 chuangin he natna vang hian harsatna tawkin emergency puan a lo ni tawh a ni.