Taliban-in an rorel kum 3 tlin an lawm

Afghanistan-a rorellai, Taliban chuan Nilaini, August 14 khan rorelna an chelh kum thum a tlin lawmna neiin military parade an nei a, an ralthuam - homemade bomb leh fighter aircraft te an pho lang bawk.

Taliban hian August 15, 2021 khan Afghanistan-a civil sorkar paihthlain thuneihna an chelh a, mahse Afghan calendar-ah chuan anniversary hma ni ah zawk chhinchhiah niin, a lawmna pawh hi August 14 ah an nei a ni. Kum thum chhung thuneihna chelh tawh mah se eng ram mahin Taliban sorkar hi an la pawm lo.

Taliban armed force-te chuan Bagram-a US air base-ah Soviet-era tank leh artillery te an pho chhuak a, he hun hi China leh Iran palaiten an hmanpui a ni. Motorbike ten zui bawkin, heng bike-ah hian jerry can an phuar a, hei hi ram dang sipaite beihna atana homemade bomb an siam tihpuahna atana an hman ṭhin a ni. Parade neih lai hian base chung boruakah helicopter leh fighter aicraft-te thlawh tir an ni bawk.

Prime minister Mohammad Hassan Akhund chuan an ram awptu, khawthlang ramte laka hnehna an chan theih avangin Taliban thuneitute a fak thu a sawi a, Taliban sorkar chuan Islamic rule kengkawh a, mipuite leh an thil neihte venghim a, an ram tizahawm turin mawphurhna a nei a ni, a ti.