Bangladesh PM hlui leh midang 9 chhui hna ṭan

Bangladesh zirlaiten nawrh an huaihawt laia pawikhawihna thleng chhui chian hna chu Bangladesh International Crimes Tribunal (ICT) chuan a thawk ṭan. He thubuaiah hian prime minister hlui, Sheikh Hasina leh mi dang pakua chhui chian an ni.

Hasina leh a party, Awami League-a hruaitu langsar dangte lakah hian Nilaini khan thubuai thehluh niin ICT hian chhui chianna a ṭan nghal a ni. Thubuai hi nawrh huaihawtnaa nunna chan, pawl 9 zirlai Arif Ahmed Siam-a pa Bulbul Kabir-a thehluh niin Hasina leh midangte chu tharum hmanga nawrh huaihawt hmehmih tumah a puh.

Bangladesh sorkar lailawk chuan Nilaini vek khan July 1 leh August 5 inkara tualthihna thleng zawng zawng chhui a ni dawn tih a lo puang tawh bawk. Hei hi nawrh huaihawt laia nunna chante thih dan chhuichian a tumna niin Hasina leh a kaihhruai sorkar pawikhawihna hailan tumna nia ngaih a ni.

Hasina leh midang paruk lakah thubuai dang thehluh a lo ni tawh bawk. Dhaka khawpuia dawr neitu, Abu Saeed chu police-in kap hlumin, Hasina leh midang parukte chu inhnamhawih ngeia hriat an nih avangin an lakah thubuai thehluh a ni. Dhaka court chuan police hnenah Septermber 15 hmaa hemi chungchang an chhuina report thehlut turin a hriattir a ni.

Bangladesh-ah hian hna lak chungchanga quota siam dana duh lohna lantirna chu August thla tir khan sorkar paih thlak tumnaah changin, mi 560 chuangin an thih phah a ni. PM Hasina chuan banna thehlutin India ramah himna zawngin a tlanchhe zui bawk. Hasina hi tlanchhe mah se dan hmang umzui niin nawrh laia tualthihna hrang hrang thlengah amah leh a kahhruai midangte lakah thubuai thehluh a ni.