Climate activist-ten Germany airport pali-ah nawrh huaihawt

Climate activist-te chuan Germnay-a airport paliah nimin khan nawrh an huaihawt a, airport pahnihah thlawhtheihna thlawk chhuak tur a khaihlak phah. Nawrh huaihawtte hi man nghal an ni.

Activist group, Letzte Generation (Last Generation) mi leh sa pariat chu Cologne Bonn, Nuremberg, Berlin leh Stuttgart airport-ah lutin, 'Oil kills' tih ziahna banner an va pawt parh nia tarlan a ni. He pawl hian Germany chu kum 2030-a oil, gas leh coal hmang lo tura inbiakna neihpui leh, inremna siam an phut a ni.

Airport-a lutte hian runway chu thleng lo mah se, Nuremberg leh Cologne Bonn-ah chuan darkar hnih chhung thlawhtheihna thlawk chhuak tur an tibuai a, activist chu leiah an mu tlat niin an sawi. Berlin leh Stuttgart-ah erawh activist palite chu police-ten la sawn thuaiin, service a buai phah lo thung. Police-te chuan nawrh huaihawt activist pariatte man vek an nih tih an sawi.

Interior minister Nancy Faeser chuan climate activist-te chet dan chu demin, 'An chet dan hi a mawl thlakin a hlauhawm hle. An nunna chauh nilo, mi dang nunna pawh dinhmun derthawng takah an dintir a ni," a ti. Cabinet-in thla hmasa lama a lo pawm tawh angin, airport-a phalna nei loa lutte chu hremna na tak pek zel an ni tawh dawn tih a sawi bawk. He bill-ah hian airport-a taxiway leh runway-a lut lui, civil aviation leh midangte dinhmun hlauthawnawma siamte chu kum hnih thleng lung-in tan tir theihna tur siam a ni.

Climate activist-te hian airport an bitum fo a, July thla khan Germany-a airport lun ber, Frankfurt ah pawh nawrh lo huaihawt tawhin, darkar hnih chuang traffic an tibuai tawh bawk.