Australia-in Iraq-ah sipai 300 thawn belh dawn

Australia chuan Islamic State (IS) firfiakte beihnaa Iraq sipaite pui turin sipai 300 a thawn belh dawn.

Australia Prime Minister Tony Abbott chuan Iraq pui tur hian sipai 200 an thawn lut tawh a, hengte hian firfiakte laka beihpui thlaknaah pawh hlawhtling takin Iraq sipaite an lo pui tawh a ni, a ti. Mahse Iraq hian puitu a la mamawh belh reng avangin sipai 300 hi dahbelh an nih tur thu thu a sawi.

Iraq Prime Minister Haider Al-Abadi pawhin Australia sipai thawn belh tur hi a thlawp tih Abbott chuan a sawi. Mahse Iraq hian khawmuala a sipaite leh firfiakte inbeihnaah ramdang sipaite puihna a duh loh avangin, Australia sipaite pawh hi khawmuala inbeihnaah chuan an tel lo ang.

Iraq sipaite chuan nikum June thlaa IS firfiakte'n sipaite kut aṭanga an lak, an President hlui Saddam Hussein-a khua, Salahuddin province khawpui Tikrit khaw chhehvela district-te laklet tumin an bei mek. Firfiakte bei tur hian sipai 30,000 vel tirh an ni a, an ni hian peng hrang hrang aṭangin an bei dawn a, khawmual sipaite hi jet fighter-in chung lam aṭangin puih an ni bawk ang.

Tikrit hmarchhak lamaa district pahnih, al-Tin leh al-Abeid chu sipaite hian firfiakte kut aṭangin an la let tawh a, al-Dour leh in-Alam district-ahte an inbei mek bawk. Thi leh hliam zat hi finfiah theih ni lo mah se, sipai panga leh firfiak 11 an thi tawh nia sawi a ni.

US kaihhruaiin ṭangrual pawlte'n IS firfiakte lakah hian beihpui thlak ṭhin mah se, tun ṭuma Iraq sipaite'n beihpui an thlaknaah hian an pui lo tih an sawi.

IS hian member thar lak tumin nitin social network kaltlangin sawmna a sang tel an tichhuak ṭhin a, hei vang hian Twitter chuan IS member-te account a block sak. Hei hian IS member-te a ti thinur hle a, Twitter-a thawkte leh Twitter co-founder Jack Dorsey vauna thu online hmangin an tichhuak leh a ni. Hemi hma hian Twitter CEO Dick Costolo pawh vawi eng emaw zat an lo vau tawh bawk.