Venezuela-in US embassy tihtlem hun bituk sak
Venezuela sorkar chuan an rama US embassy staff awm zat chu 80% dawna titlem tura hriattirin, US sorkar chu hemi atan hian ni 15 hun a pe.
Venezuela-ah hian US embassy staff 100 dawn an awm. Mahse staff awm zat hi US-a Venezuela embassy staff awm zat 17-a tihniam turin US chuan an hriattir tih Venezuela Foreign Minister Delcy Rodriguez-i chuan a sawi. "US chuan diplomat 17 chauh a dah chhunzawm thei tawh dawn a, a dah chhunzawm tumte hming list hi ni 15 chhung ngeia thehlut turin kan hriattir a ni," a ti.
US sorkar chuan Venezuela official eng emaw zat lakah hrekna a siam a, hei vang hian hrekna a siam hi chhanlet a ni dawn tih Venezuela President Nicolas Maduro chuan a lo sawi tawh a ni. Venezuela-a zin tur, US mite chuan visa an dil a ngai tawh dawn a, hei bakah hian US official ṭhenkhat chu Venezuela-a an zin khapsak tlat an ni bawk. Official zin an khap zingah hian President hlui George W Bush leh senator ṭanglai pahnih Bob Menendez leh Marco Rubio-te pawh an tel.
Tun hnaiah US leh Venezuela inkar boruak hi a ṭha lo chho hle a, Maduro chuan sorkar laka lungawi lohna lantirtu, eptu pawlte chu US hian a thlawp tiin a puh a, mahse hei hi US chuan thu dik lo a ni tih a sawi thung. Kum 2010 aṭang khan ram pahnihte hian ambassador an indah tawn tawh lo.