Israel PM Netanyahu-in US Congress-ah thu sawi

5th March, 2015

Republican hruaitute sawmna angin, Israel Prime Minister Benjamin Netanyahu chuan nimin khan US Congress joint session-ah thu a sawi.

Israel PM thusawi tura sawm hi Democrats lam chuan an sawisel a, hei vang hian thu a sawi ṭum pawh hian Democrats member 50 vel an tel lo.

Benjamin Netanyahu chuan Iran nuclear deal siam tum chu ṭha a tih loh thu a sawi a, inremna ṭha tawk siam a nih loh chuan Iran tan nuclear bomb siamna remchangah a chang thei a ni, a ti. Hei vang hian Iran chu inremna siampui loh a ṭhat zawk thu a sawi.

Khawthlang ramte leh Iran-in nuclear deal siam tuma inbiakna an neih mek chu Israel PM hian a dodal a, inremna hi siampui a nih chuan Iran chu nuclear infrastructure ṭha tak neiin, reilote chhungin bomb an siam mai dawn a ni, a ti. Iran bomb siamna kawng dal loin, bomb a siam theihna tur kawng an hawnsak zawk mai dawn nia a ngaih thu a tarlang.

Israel PM-in Iran nuclear deal siam tum a duh loh thu Congress-a a sawi mek lai hian, US Secretary of State John Kerry chuan P5+1( United States, Britain, France, Russia, China plus Germany) te'n March thla chhunga Iran nuclear deal siam tuma an hmalakna bawhzui nan Iran minister Mohammaad-Javad Zarif chu Switzerland-ah inbiakna a lo neihpui mek thung. P5+1 hian nuclear deal hi June thla ral hma ngeia siam fel hman an tum.

Israel hruaitu chuan eng inremna pawh siampui se, Iran-in uranium sawngbawl hna a kalpui mek chu tihtawp sak turin a ngen. Mahse US chuan urnanium sawngbawl hna tihtawp sak hi thil theih a nih loh tur thu a hmain a lo sawilang tawh a ni.

Netanyahu hian minute 40 chhung thu a sawi a, US Congress-a thu a sawi ṭum thumna a ni. Nuclear ralthuam nei Iran chu Israel himna tiderthawng thei a nih bakah, khawvel pum himna atan pawh a hlauhthawnawm a ni, a ti.

US President Barack Obama chuan Netanyahu-a'n Iran laka a policy a sawi chungchang hi chhang letin, Iran nena inbiakna kalpui mek chungchangah kalphung thlakna tur rawtna rintlak engmah a siam lo a ni, a ti. Obama chuan Netanyahu hi meeting a neihpui dawn lo tih a sawi bawk.