Iraq sipaite'n ISIS second-in-command an that

Islamic State (IS) firfiakte kut aṭanga Tikrit khaw laklet tumin Iraq sipai 30,000 vel chuan beihpui an thlak mek a, firfiakte pawh hi an hnungtawlh ṭan nia sawi a ni.

Iraq sipaite hian beihpui an thlaknaah IS hotu lu ber dawttu, second-in-command an that niin an sawi. Sipaite hi Shi'ite leh Sunni tribal fighter-te'n an pui bawk a ni.

Firfiakte kut aṭanga Tikrit an lakfel hunah, Iraq sipaite chuan oil tamna, Mosul khua lalet tura beih chhunzawm an tum. Mosul hi Tikrit hmarlam, mel 140-a hlaa awm a ni. Sipaite hian hma sawn zel mah se, firfiakte hian kawngkamah bomb an kam nasat avangin hei hian an chetlakna a tihmuan phah niin official-te chuan an sawi.

Libya ram hruaitu hlui, Colonel Muammar Gaddafi-a laichin, Ahmed Gaddaf al-Dam chuan IS hian an rama mithar lak runpui a nei mek a, an rama pemlutte chu an pawlah eng emaw zat an la lut tawh niin a sawi. Gaddaf al-Dam chuan IS-in mi an lak tharte hi kum khat hnuah chuan Europe-ah tirin, al-Qaida firfiakte'n 9/11-a US a pawikhawihna rapthlak tak an thlen tir ang khan Europe ramah an la thlentir mai a hlauhthawn thu a sawi.