Snowden-a'n US-a kir leh a duh tawh

US National Security Agency contractor hlui, agency thuruk a tihput vanga himna zawnga Russia rama tlanchhe mek, Edward Snowden chuan an rama kir leh a chak tawh tiin a ukil chuan a sawi.

Thuruk a puanzar avang hian Snowden hi ram phatsantua puhin thubuai pathum siamsak a ni a, hei vang hian himna zawngin kum 2013 August thla aṭang khan Russia ramah hian refugee angin a awm a ni. Russia hian Snowden hi kum thum chhung atan residential permit a pe a, mahse Russia a chhuahsan rualin refugee status hi tihtawp a ni nghal ang.

Snowden-a ukil Anatoly Kucherena chuan Snowden-a chanchin behchhana documentary novel a ziah, 'Time of the Octopus' presentation a peknaah he thu hi a sawi a, "Snowden hi venhimna hnuai­ah a awm mek a, a chetvel dan pawh uluk taka thlithlai reng a ni a, a awmdan boruak avang hian amah pawh rilru hahdam taka awm a har a ni," a ti. Mahse nunphung pangngai taka nun tumin Snowden hian theater leh bazar-te a tlawh fo ṭhin a ni, a ti.

Russia ramah hian Snow­den hi zalen taka awmin, Russia ram nunphung milin inher rem ve zel mah se, US lamah kir a chak tawh hle niin a ukil chuan a sawi a, "US-a a kir leh theihna turin theihtawp kan chhuah mek a ni," a ti. A thusawite dik lo taka lakkawih a hlauhthawn avangin

Snowden chuan Russian media-te pawh hmaichhana kawm a duh lo tih a sawi bawk.