Thailand PM thar atan Paetongtarn Shinawatra thlang

Thailand danpui bawhchhiat avangin Srettha Thavaisin prime minister aṭanga ban a nih hnuah, parliament chuan nimin khan PM thar atan Paetongtarn Shinawatra an thlang. Paetongtarn hi kum 37 mi niin, Thailand PM dinhmun chelh thei naupang ber a ni.

Prime Minister thar, Paetongtarn hi PM hlui Thaksin Shinawatra fa pathum zinga a naupang ber niin Shinawatra chhungkua aṭanga PM nihna chelh thei pathumna a ni bawk. Paetongtarn hma hian a pa, Thaksin Shinawatra leh a ni, Yongluck Shinawatra te chu PM an lo ni tawh. Thaksin hi kum 2006-a sipai chakna hmanga paihthlak niin himna zawngin ram pawn lamah hun rei tak a khawsak hnuah, nikum inthlanpuia Pheu Thai in hnehna an chan khan Thailand-ah hian a kir ve leh chauh a ni.

Paetongtarn hi Thailand-a ṭangrual sorkarna siam mektu zinga party pakhat, Pheu Thai party hruaitu niin nimin khan parliament chuan PM atan a thlang a ni. Paetongtarn hi PM naupang ber a nih bakah Thailand-a hmeichhe PM pahnihna a ni bawk.

Thailand PM a nih anga thu a sawina hmasa berah, Paetongtarn chuan PM kal chhuakta Srethha ban a ni chu pawi a tih thu leh a ṭhawn thu a sawi a, hemi hnu hian ram inrelbawlna kawnga tel ve turin thutlukna a siam tih a sawi.

PM thar hian parliament-ah hian vote 319 hmuin hei hi hmun thuma ṭhena hmun hnih zet a tling a ni. Paetongtarn chuan Thailand-in hmalam pana kal a mamawh thu a sawi a, hemi tur hian mipuite chu ṭanrualpuiah a sawm. Paetongtarn hi sorkar inrelbawlna lamah a la inhnamhnawih ngai lo a, an chhungkaw sumdawnna lamah a pui zawk ṭhin. Kum thum liam ta khan politics a luhchilh ve chauh a ni.