Suu Kyi-i in lilamnaah chhangtu an awm lo

Myanmar civil hruaitu, sipai sorkarin jail-a tantir mek, Aung San Suu Kyi-i in, Yangon khawpuia mi chu August 15 khan a ṭum hnihna atan lilam a ni leh a, mahse a hma ang bawkin lei tuma chhangtu an awm lo.

He in hi chhawng hniha sang niin, a ram hi acre 1.9-a zau a ni. Sipai sorkar hmasa khan he inah hian kum 15 chhung zet chu Suu Kyi hi house arrest-in a lo dah tawh a ni. Hemi chhung hian US president hlui Barack Obama, secretary of state hlui Hillary Clinton leh UN secretary-general hlui Ban Ki-moon te chuan an lo tlawh tawh a ni. House arrest aṭanga chhuah zalen a nih hnuah, Suu Kyi hian kum 2012 khan civil sorkar ding chu kaihruai turin Yangon hi chhuahsanin an ram khawpui, Naypyidaw-ah a insawn a ni. Mahse kum 2021-a sipaiten civil sorkar thuneihna an hnehchhuh hnuah Suu Kyi hi manin jail-ah tantir a ni zui leh a ni.

Lilamna zat hi kyat tld 300, USD mtd 140 vela ṭan a ni. Lilamtute hian gate bulah lei duh an awm leh awm lo zawtin an au a, mahse tumah rawn chhuak an awm loh avangin chhangtu an awm lo tiin an lilam hi an titawp zui a ni. Kumin March thla khan a vawi khatna atan lilam a lo ni tawh bawk a, hemi ṭum hian kyat mtd 315 chhiar a ni.