Pakistan-ah mpox hri kai hmu chhuak

Pakistan hmar lam, Khyber Pakhtunkhwa province-ah nimin, Zirtawpni khan monkeypox virus natna kai mi pathum hmuh chhuah an ni tih health department chuan a tarlang. Heng mite hi United Arab Emirates aṭanga Pakistan lut an ni tih an tarlang bawk.

Pakistan ramchhunga mpox hri kaite hian eng variant ber nge an kai tih hriat a la ni lo a, mi pahnih chu mpox hri ngei a ni tih an finfiah tawh a, mi pakhat sample erawh National Health Institute, Islamabad-ah enfiah mek a la ni thung.

World Heath Organisation (WHO) chuan Africa-ah mpox hri a darh chak em avangin Nilaini khan global heath emergency a puang. Congo-ah kum 2023 January aṭang chhutin mi 27,000 in hri hi kaiin mi 1,100 in an thihpui tawh a ni.

WHO chuan monkeypox virus hian vunah thak nasa tak thlenin lymph nodes lian leh khawsik thlengin a thlen thei tih an tarlang. A tuarna zualte chuan chauhpuiin thihna a thlen thei a ni.

Sweden-ah August 15, Ningani khan mpox variant thar kai hi hmuhchhuah a ni bawk. Hei hi WHO-in emergency a puan hnua Africa khawmualpui pawna he natna hri kai an hmuh hmasa ber a ni.