Ramdang sipai puihna tel loin Iraq-in Mosul khua laklet a tum

Iraq Defence Minister, Khalid al-Obiedi chuan Islamic State (IS) firfiak pawl kuta awm mek, an ram hmarlama khawpui lian Mosul chu ramdang sipaite puihna tel loin Iraq sipaite'n laklet an tum thu a sawi.

Iraq khawpui pawi­mawh leh oil siam­chhuahna hmunpui, Mosul hi nikum khan IS firfiakte hian Iraq sipaite nen hun eng emaw chen an inbeih hnuah sipaite kut aṭanga laksakin tun thlengin an thununna hnuaiah a la awm. Firfiakte hian Mosul biala oil-te chu hralhchhuakin, sum lakluhna hnar ṭha tak atan an hmang zui a ni.

Minister chuan an ram tlawhtu, Turkey Defence Minister Khalid al-Obiedi nen Baghdad-a joint press conference an neihah he thu hi a sawi a ni. Mosul khua lalet tura an beihna chu ruahmanna fel tak hnuaiah a hun taka neih a ni dawn a, hemi atan hian ramdang sipaite puihna dil an tum lo tih a sawi bawk.

Turkey Minister hi IS beih dan tur chung­chang Iraq hruaitute sawipui tura zin a ni a, a zin chhuah hma lawk hian Turkey chuan Iraq sipaite puihna turin sleeping bag, blanket, helmet, assault vest, camouflage desert cap-te Iraq-ah hian a lo thawn lut tawh a ni.