Myanmar police-te'n nawrh huaihawtte an man

Myanmar police-te chuan hlawh tihsan leh hnathawhna dinhmun ṭha zawk pek phuta nawrh huaihawt, factory-a hna­thawktu mi eng emaw zat chu Yangon khawpui pawnah an man.

Nilaini zan khan fac­tory worker 100 vel chuan an thawhna factory aṭang­in Yangon khawpui pana kawngzawh an tum a, mahse police-te'n an lo dang a ni. Hemi hnu hian hnathawktute hian sit-in protest an huaihawt zui a, heng mite hi police-te chuan an man a, journalist pahnih an man tel bawk.

Hetihlai hian zirlaite chuan an ram zirna siam-ṭhat phutin sorkar an nawr ve mek bawk. Zirlai­te hian Yangon khaw­puia kawngzawh huai­hawt an tum a, mahse sorkar chuan zirlai pawl leh factory worker-te hi Yangon khawpuia kawng an zawh chuan an laka action lak a nih tur thu hrilhin a vau.

Yangon khawdaia factory hrang hranga thawkte chuan thla hmasa aṭang khan an inhlawhna rate tihsan leh, overtime pay pek phutin nawrh an huaihawt a, mahse tun thlengin factory neitute nen inremna an la siam thei lo.