Putin-a'n inthahna thleng tawh lo turin a duh

Russia President Vladimir Putin chuan an rama politics vang inthah­na thleng a awm ṭhin chu pawi a tih thu sawiin, hetiang thil hi thleng tawh lo se a duh thu a sawi.

Russia ram eptu hruai­tu, deputy prime minister hlui Boris Nemtsov chu kar kalta Zirtawpni zan khan Russia parliament, Kremlin bula kahhlum a ni a, Thawhlehni khan ropui taka vui a ni.

Nemstov kahhlum a nih chhan hi hriat a ni lo a, mahse eptu pawlte chuan a thihnaah hian President Putin leh a kaihhruai sor­kar chu inhnamhnawihna neiah an puh. An puhna hi sorkar lam chuan thudik lo a ni, an ti.

Eptu hruaitu Nemtsov hian Ukraine khawchhak lam buainaa Russia inrawlh dan a duh loh avang­in Moscow-ah kawngzawh huaihawt a tum a, mahse kawng an zawh hma ni-ah kahhlum a ni. Eptute chuan President Putin hian a hmalakna a dodal avangin Nemstov hi a thahtir niin an puh.