SKorea-a US ambassador chem hmanga beih a ni
South Korea-a US ambassador, Mark Lippert chu North Korea activist nia hriatin Seoul khawpuiah chemin a bei a, a biang ding lamah hliam a tuar.
Pawikhawihtu hian chemte inches 10-a sei kengin, nimin zing dar 7.40 velah ambassador-in Sejong Cultural Centre-a thusawi tura a inbuatsaih lai chu a bei ta a ni. A biang dinglam bakah a kutah a chem hian a vai fuh hman niin police-te'n an sawi a, a beih chhan hi US leh South Korea sipaite'n joint military drill an neih vang nia sawi a ni bawk.
US ambassador beitu hi kum 55 mi, Kim Ki-Jong a ni a, tun hma lam pawhin North Korea ṭan zawngin a lo che chhuak tawh ṭhin. Kum 2010 khan Seoul-ah vek hian Japan ambassador chu lungin a lo vawm tawh bawk.
Nimina US ambassador a beih hmain Kim Ki-Jong hian US-South Korea drill neih mek avang a lungawi loh thu a lo sawichhuak tawh a, he thil hian North leh South Korea-te'n inremna kawng zawnga inbiakna an neih a tihbahlah phah niin a sawi.
US leh South Korea sipaite hian tunkar chhungin joint military drill an nei mek a, hei hi North Korea chuan na takin a sawisel tawh a, a lungawi lohna lantirna leh vauna tan ballistic missile pahnih a kapchhuak tawh bawk a ni.
White House chuan Seoul-a a ambassador in beih a tawk chu a dem thu a sawi a, President Barack Obama chuan Mark Lippert hi a be nghal a ni.