Clinton-i'n a email puangzar dawn

Hillary Clinton-i chuan US Secretary of State a nih laia a email chungchanga inhnialna awm zel avangin a email hi mipuite hmuh theih tura puangzar turin official-te a hrilh.

Kum 2012-a Benghazi-a US embassy beih a nih chungchang chhuitu, Congresssional Committee chuan Clinton-i email hi a dil a ni. State department chuan Clinton-i'n sorkara dinhmun pawimawh tak a chelh laia a personal email a hman dan pawh a chhuichiang mek bawk.

Kum 2009-2013 chhunga US Secretary of State a nih lai khan, Clinton-i hian government email address hran nei loin, a mimal email a hmang ṭhin. Hei hi dan bawhchhiahna pakhat a nih thu National Archives and Records Administration official-te chuan an sawi.

Official-te thuthawn leh dawnte chu sorkar record-a dah tur a nih avangin, Clinton-i pawh hian Secretary of State a nih laia a email dawn leh thawn, phek 55,000 zeta chhah chu State Department hnenah a hlan a ngai dawn a ni.