IS-te'n Iraq hmanlai khawpui an chilchhia, oil field an hal bawk

Islamic State (IS) firfiakte chuan Iraq hmarlama Assyrian khawpui hlui, Nimrud chu an chil chhiatsak a, hei bakah hian Tikrit khaw bula oil field an hal bawk.

Nimrud hi BC 13 hunlaia sak a ni a, Iraq khawpui lian ber dawttu, Mosul chhim lama Tigris River bula awm a ni. Nikum June thla khan IS hian Mosul khua hi an la tawh a ni. Nimruk khawpui hi hmanlai thil hlu humhalh zing a mi a ni a, mahse firfiakte hian Ningani khan motor lian tak tak hmangin hmun pawimawhte chu an chil chhia a ni. Nimud hi Calah tia sawi ṭhin a ni a, banga hung chhuah vek niin a vanglai chuan mi 60,000 vel an cheng nia sawi a ni a, khawpui chhungah hian huan leh park lian tak tak a awm.

Iraq archaelogist, Abdulamir Hamdani chuan IS-te hian Iraq hmun hlui pawimawhte chu tihchhiat zel an tum niin a sawi a, Nimrud dawta an bitum leh tur chu Hatra a nih a rin thu a sawi bawk. Hatra khawpui hi kum 2,000 chuang zeta upa ni tawhin, UNESCO world heritage site a ni bawk.

Kar hmasa khan firfiakte hian Mosul museum-a hmanlai thil hlu an vawnṭhatte chuan an lo tihchhiatsak tawh bawk a, hei hi mithiam te'n an dem thu an sawi. Archeologist leh heritage expert-te chuan IS te chetdan hi kum 2001 a Taliban firfiakte'n Aghanistan-a Bamiyan Buddha an tihchhiatte nen an khaikhin.

Firfiakte hian Mosul khaw­puia mi, kum 850-a upa, Crookef Minaret chu tihchhiat an tum bawk a, mahse tualchhung mite'n an ven tlat avangin an tichhe thei lo a ni.

Iraq hmarchhak lama Tikrit khawpui chu firfiakte kut aṭang laklet tumin Iraq sipaite ngawrh takin an bei mek a, sipaite hian hma an sawn zel avangin firfiakte hian lo danna leh invenna atan Tikrit khawpui bula oil field an hal.

IS-te hian sipaite'n helicopter aṭanga an beihna laka invenna atan Ajil oil field an hal niin sipaite chuan an sawi. Ajil oil field hi nikum June thla khan firfiakte hian an la a, he oil field aṭang hian nitin crude oil barrel 25,000 siamchhuah a ni a, hei hi Kirkuk-ah a thlitfimna hmunah lawnga kalpui ṭhin a ni.

Firfiakte hian oil field an lakte aṭang hian nitin sum ṭha­hnem tham tak an la lut ṭhin.