PLO-in security agreement siam a titawp dawn

Palestine Liberation Orga­nization (PLO) chuan kum 1993 aṭanga Israel nena security lama thawhdunna tura, Oslo Accords an siam chu tihtawp a tum a, West Bank-a central council meeting neihah thutawp a siam ang.

Security agreement hi tih­tawp a nih chuan Palestinian helpawlte chungchanga informa­tion an inpek ṭhin pawh tihtawp a ni ang. He inremna tihtawp hian Israel leh Palestinian Authority inkar boruak pawh a tihchhiat zual rin a ni.

Observer-te chuan PLO thutlukna siam hi Israel-in Palestinian Authority hnena chhiah pek tur a pek duh loh vanga chhan letna nia an ngaih thu a sawi. Mahse Palestinian lam chuan chhiah pek chhuah duh loh vanga nawrna atana ti an nih loh thu sawiin, an thutlukna siam chu thlak an tum lo tih an sawi bawk.

Israel hian kumin January thlaa Palestinian Authority-in International Criminal Court (ICC) zawm a tum thu a tihtluk avang khan Palestinian hnena chhiah a pek tur pawh a pe lut duh lo a, hei vang hian sorkar hna thawk sang telin hlawh an lak theih loh phah a ni.