IS-te'n khawpui hlui Hatra city an tichhe leh

Islamic State (IS) firfiakte'n Iraq hmarlama khawpui, hmanlai thil hlui dahkhawmna hmun pawimawh tak, Nirmud khua an tihchhiat hnuah, Nineveh province chhim lama khawpui hlui, Hatra city an tichhe leh.

Iraq Tourism and Antiquities Ministry chuan thu­chhuah siamin, "IS te chuan Hatra khawpui chu lain an tichhe leh ta a ni," a ti. He khawpui hi kum 2,000 zet upa niin, Nineveh pro­vince khawpui Mosul aṭanga chhimthlang lam, km 110 vela hlaah a awm a ni.

Hatra khawpui hi bang sang tak tak leh, khaw­pui huala watchtower awmte avanga hriat lar a ni a, hei bakah hian temple leh bang chhe ṭhen tawh eng emaw zat a awm bawk. Hengte hi Greek leh Rom architecture chawhpawlh, khawchhak lam zia hmanga chei mawi an ni. Kum 1987 khan UNESCO chuan Hatra city hi UNESCO World Heritage List-ah a lo telh tawh a ni.

Ministry thuchhuah chuan khawvel ram hrang hrangte chu firfiak­te do letna kawnga Iraq thlawpna an lantir hun an tihkhawtlai avangin a dem tih sawi a, hei hian fir­fiakte tan hun remchang siamin khawpui hlui leh pawimawhte tichhe turin a cho phur phah a ni, a ti.

Hetihlai hian IS kut aṭang Tikrit city laklet tuma bei mek, Iraq sipaite chuan hma an sawn zel a, khawpui bula khaw ṭhenkhat chu an la let tawh a ni.

Iraq sipaite hi Shia fighter-te'n an thlawp a, kar kalta Zirtawpni khan Tikrit chhimlama al-Dour khua chu an la let tawh a, he hmun hi kum 2003-a Iraq ram hruaituhlui, Saddam Hussein-a bihrukna bial kha a ni. Inrinni khan khaw pahnih, al-Alam lak let tumin an bei leh bawk.

Nigeria helpawl, Boko Haram chuan an pawl Twitter account-ah IS an thlawp thu an sawina, audio statement an tichhuak. A hma pawhin Boko Haram hi al-Qaida firfiak pawl nena inzawmna nei nia sawi an lo ni tawh bawk.