MH370 bo champha-ah hriatrengna hun hmang

Malaysian Airlines thlawhtheihna, Flight MH370 chin hriat loha a bo champha vawikhatna, nimin khan Malaysia ramah thlawhtheihnaa chuangte hriatrengna hun hman a ni.

Kuala Lumpur-ah thlawhtheihnaa chuang, mi 239 chhuangte puitu pawl, Voice 370 chuan Day of Remembrance hi a buatsaih a, chin hriat loha thlawhtheihna bo chu zawn chhunzawm zel an tum tih an sawi.

Flight MH370 them hi a zawn hna thawhnaa hmahruaitu- Australia, Malaysia leh China-te chuan an la hmu lo a, mahse a tlakna hmuna nia hriat, Indian Ocean chhim lama he thlawhtheihna tla hi hmuh ngei beiseina a la nei reng tih an sawi.

China foreign minister, Wang Yi chuan thlawhtheihna hi a bo aṭangin kum khat a liam tawh a, beiseina siam thei thil engmah hmuh la ni lo mah se zawn chhunzawm reng a ni ang, a ti.

Malaysia Prime Minister Najib Razak chuan ramdang an thawhpuite nen, finfiahna awm thei angte chu an bawhzui zel tih a sawi a, MH370 them engmah hmuh a la ni lo chuan rilru ti beidawng hle mah se, thlawhtheihna bo chu an hmuh leh ngei a beisei tlat tih a sawi.

Malaysia sorkar chuan thlawhtheihna bo champha-ah hian a bo dan chhuina report hmasa chu a tichhuak dawn a ni.