Myanmar-a mipui sorkar tundin a nih theih nan China-in a ṭanpui ang : China FM

China foreign minister, Wang Yi chuan Thailand a tlawh ṭumin Myanmar buaina ata hnukchhuak tura an ṭanpui tur thu sawiin, mipui sorkar tundin leh a nih theih nan China chuan a ṭanpui dawn a ni, a ti.

Wang Yi hian kar liam ta khan Myanmar tlawhin sipai hotu, Min Aung Hlaing nen inkawmna hun an nei a ni. "China hian Myanmar-a remna leh muanna a awm theih nan theihtawp a chhuah chhunzawm zel dawn a ni," tiin a sawi. China leh Myanmar inkar boruak ṭha tichhiat tuma beihna chu China chuan a dodal zel dawn tih a tarlang bawk.

Myanmar sipai thuhnuaia awm thuthar thehdarhtute chuan an rama chhiarpui neih a nih theih nan China chuan sum leh a thiamna hmanga ṭanpui a tum niin kar liam ta Ningani khan a tarlang a, chhiarpui neih zawh a nih hnu hian nakkum lamah inthlan neih tum a ni tih an tarlang bawk.

Sipaiin kum 2021, February-a civil sorkar thuneihna an hnehchhuh hnuah Myanmar hi buaiin sipai sorkar leh helpawl chuan tualchhung indona an la nei reng a ni. Helpawl intelkhawm, Three Brotherhood Alliance chuan tun hnaiah an ram hmarlama hmun leh infrastructure pawimawh tak takte chu sipaite kut aṭang hian an laksak tawh a, heng zingah hian Shan state hmar lama military base leh khawpui pawimawh tak Lashio te pawh an tel. Myanmar buaina a reh theih nana Association of Southeast Asian Nations (ASEAN) in hma a lakna chu China-in a thlawp tih Wang Yi chuan a sawi bawk.