US Inthlanpui : Harris-in hnehna a chan chuan thil man tihhniam a tiam

United States president inthlana Democrats aiawha ding tur, Kamala Harris chuan a policy a sawina hmasa berah America mipuite tan thil man tihniam tura ṭan a lak tur thu leh, economic security an neih theih nan hma a la dawn tih a sawi.

Harris hian ram chhung sum leh pai dinhmun chawikang turin theihtawp a chhuah dawn tih sawiin, sumdawngten ei leh in man sang tak taka an chhiar ṭhin chu tihtawp a tum tih a sawi bawk. Ram chhunga Middle Class-te dinhmun chawi kang chu a thiltum pakhat a ni, a ti bawk.

US khua leh tui, ram chhunga an chenna tur in, a ṭum khat nana leite ṭanpui nan USD 25,000 dawn theihna tur scheme siam a tum bakah chenna in tlawm zawka sa theite tan chhiah tihtlem a tum bawk. Hemi bakah hian naupiang thar awmna chhungkaw tan kum khat chhung tax credit USD 6,000 siam a tum bawk a ni.

Harris khingpui, Donald Trump hian kar liam ta khan North Carolina-ah vek hian ramchhung sum leh pai dinhmun siamṭha tura hmalak a tum dan a lo sawi tawh a, heng zingah hian thil man sang zel tihtawp, hna siam belhna dal thei dan zam ṭhenkhat tihtawp leh leiba an rulh theih nan sum dinhmun chawikan a tum thute a sawi a ni.