Sudan RSF-ten chhawmdawlna thawn luh remti

Sudan ram chhung buaina vanga mipuite tuarna tihziaawmna turin Rapid Support Forces (RSF) chuan chhawmdawlna thawn luh an remti. Tualchhung buaina avang hian mi mtd 25 chuang rilṭamin an awm mek tih tarlan a ni.

Sudan-ah hian kum 2023, April thla aṭang khan buaina chhuakin Sudanese army, Abdel Fattah al-Burhan kaihhruai leh Sudan paramilitary Rapid Support Forces, Mohamed Hamdan Daglo ten thuneihna an inchuh avangin tualchhung indona a chhuak a, mipuite chuan an tuar hle.

Ramchhunga remna a awm theih nan leh mipuite tuarna a ziaawm theih nan US leh khawvel ramdang bakah United Nations leh African Union te chuan palai hna thawkin, kar liam ta Nilaini aṭang khan Switzerland-ah inbiakna neih a ni.

Switzerland-a inbiakna neih hnuah Sudanese RSF hian North Dafur lama chhawmdawlna lut turin Chad nena an ramria luhkate chu hawn an remti tih an puang. Remna palaite chuan RSF thutlukna chu lawmawm an tih thu sawiin, khawvel ram dangte leh ṭanpuitu pawlte chu a rang lama chhawmdawlna thawnlut turin an ngen nghal bawk.