Thailand lalin PM atan Paetongtarn Shinawatra a pawm

Thailand Parliament-in an ram prime minister thar atana an thlan, Paetongtarn Shinawatra chu nimin khan an ram lal chuan PM atan a pawm.

Kum 37 mi, Paetongtarn hi Thailand prime minister ni thei zinga naupang ber a ni a, hmeichhia zingah Thailand PM ni thei pahnihna a ni bawk.

Parliament-in prime minister atana a thlan aṭang a ni hnih hnu, nimin khan Thailand lal, King Maha Vajiralongkorn chuan official-in PM atan hian a ruat a ni. Lalin a pawmna thu hi Bangkok-a ceremony an hmannaah House of Representatives Secretary Apat Sukhanand chuan a chhiar chhuak a ni. He hunah hian Paetongtarn hi a pa, prime minister hlui Thaksin Shinawatra pawhin a ṭawimawm a ni.

Paetongtarn chuan an ram lal, Thailand mipui leh dan siamtute chungah lawmthu sawiin, an ram tan rilru inhawng takin hna a thawk dawn tih a sawi. Thailand ram chu Thai mipuite an duhthusam an suangtuah theihna leh an hmalam hun an siam theihna hmunah a siam dawn tih a sawi.