India-a AK-47 203 rifles siamna turin Russia inremna siampui

India-a AK-47 203 rifles siam chhuah a nih theih nan Ningani khan India leh Russia chuan inremna an ziak a, Shanghai Cooperation Organi­zation (SCO) meeting-a tel tura zin mek Defence minister Rajnath Singh hma­lakna hnuaia he inremna hi ziah a ni.

Russia silai ṭha chi Avtomat Kalash­nikova (AK)-47 203 rifles hi AK-47 rifle zinga siamchhuah thar ber a ni a, India-a siamchhuah tum he silai hian India sipaiten an hman mek Indian Small Arms System (INSAS) 5.56x45 mm assault rifle chu a thlak ang.

India sipaite hman tur atan hian AK-47 203 rifles 7,77,000 mamawh a ni a, heng zinga 1,00,000 chu ramdang aṭanga lakluh tum a ni. A dang zawng chu India-a siamchhuah tum a ni tih Russia-a Sputnik news agency chuan a tarlang. 

India-a AK-47 203 rifles siamchhuah tum chunchangah hian ministry of defence pawhin thuchhuah siamin, ram pahnihte hmalakna chu ṭha an tih thu a tarlang a, India-Russian Joint Venture kaltlanga India-a AK-47 203 rifles ṭhahnem tak siam tum a nih chu an thlawp thu a tarlang bawk. 

Russia lam pawhin India-a AK-47 203 rifles siamchhuah tum hi joint venture Indo-Russia Rifles Private Limited (IRRPL) kaltlanga siam tum a nih thu a tarlang ve bawk. 

IRRPL-ah hian Ordnance Factory Board (OFB), Kalashnikov Group leh Roso­boronexport company-te an awm.