US intelligence-in Trump campaign hack tumah Iran an puh

United States intelligence official-te chuan Donald Trump presidential campaign hack tuma hma latu chu Iran ni ngeia an hriat thu an sawi. Hemi bakah hian Kamala Harris campaign hack tumtu chu Iran bawk a ni tih an tarlang tel.

Federal Bureau of Investigation (FBI) leh federal agency dangte chuan thuchhuah inṭawm siamin, political party pahniha presidential campaign buaipuitute lak aṭangin hacker-te hian thil pawimawh an zawng a ni, an ti.

Iran-in US inthlanpui tihbuai tuma ṭan a lak chhan hi US ram chhunga inrem lohna thlen tir an tum bakah, inthlan result tidanglam tura hma an lakna pakhat niin federal official-te chuan an tarlang.

Microsoft chuan tun thla tir khan US inthlanah ram dang inrawlh tum an awm thu an lo tarlang tawh a, hetiang deuh bawk hian Google chuan Iran pawl pakhat, Revolutionary Guard nena inkungkaihna neite chuan President Joe Biden leh Donald Trump-te thawhpui hnaivai ṭhenkhat email account hack an tum tih an tarlang a ni.

Private company lian pahnihte thuchhuah hi FBI leh federal agency dangte thuchhuah inṭawm hian a rawn nemnghet a tih theih ang. US inthlan neih tur inpuahchahna kal mekah Iran-in tihbuai tuma hma a lakna a tam zel tiin federal agency-te thuchhuah chuan an tarlang a, America mipuite rilru sukthlek thlak danglam tum leh Presidential campaigns hack tuma hmalakna te pawh a tel tih an sawi.

Kum 2016 khan Hillary Clinton campaign chu hack a lo ni tawh bawk a, internal email eng emaw zat tlangzarh sakin, presidential campaign-ah pawh amah beihna lian tak a tlin phah a ni. He thil hi Russian intelligence officer-te tih nia puh a ni.