Pakistan PM hlui Imran Khan-in Oxford University Chancellor hna dil tum

Pakistan prime minister hlui, jail-a tang mek Imran Khan chuan Oxford University Chancellor hna dil a tum thu a party, Pakistan Tehreek-e-Insaf (PTI) chuan a sawi.

London-a awm, PTI thupuangtu Sayed Zulfikar Bukhari chuan Khan hian a team-te chu a hna dilna hi thehlut tura a hrilh thu a sawi. He hna dilna tura buaipui ngaite chu tihfel mek a nih thu tarlangin, Khan chu he hna dilna thehlut zingah hming langsar zinga mi a ni, a ti. Chancellor chu ni ngei thei se thil phurawm tak tur a nih thu a sawi bawk.

Imran Khan hian kum 2018 aṭanga 2022 chhung khan Pakistan PM hna hi chelhin, Parliament-ah vote of no-confidence hmanga paihthlak a ni. PM aṭanga paihthlak a nih hnuah thubuai eng emaw zat siamsak a ni a, heng zingah eiruk leh tharum thawhna thubuaite pawh telin, thiam loh chantir a ni. Kum khat chung lung-inah a tang tawh. Hetih lai hian thubuai siamsak leh lung-ina dah a nih chhan hi politics huang chhunga thuneihna a chan leh an hlauh avanga beihna niin a sawi ve thung.

Khan hian kum 1975 khan Oxford aṭang hian Philosophy, Politics leh Economics Degree neiin a lo graduate tawh a, Cricket a khelh ṭhin lai pawhin British magazine velah a hming hi a lang zing ṭhin hle a ni.

Kumin February thla khan Christ Patten chu Oxford Chancellor a nihna aṭangin a bang a, hei vang hian a post hi ruakin a dil theih a ni. Diltu zingah hian UK foreign secretary hlui William Hague leh EU trade commissioner hlui Peter Mandelson te pawh an tel. Oxford chuan Chancellor hna diltute hi October-ah puangin, hemi thla tawp lam aṭangin vote thlak theih a ni ang.