EC-in Dec 27 aṭangin Covid vaccine pe chhuak dawn
European Union chuan December 27 aṭangin Covid-19 vaccine, Pfizer/ BioNTech vaccine chu a pe chhuak ṭan dawn.
European Commission (EC) president Ursula von der Leyen chuan December 27 chu Europe ram tana hriatreng tur a ni dawn tih sawiin, vaccine sem chhuah ṭan ni atan an hmang dawn tih a sawi a ni. Mahse hemi kalpui tur chuan European Medicine Agency (EMA) in a pawmpui a ngai a, EMA hian vaccine chungchangah December 21 hian thutlukna a siam dawn a, a pawm ngei rin a ni bawk.
Vaccine hi member ramte hnenah December 26-ah thawn chhuah a ni dawn a, vaccination campaign kalpui dan tur chu anmahniin an ruahman ang.
Kumin October thla khan EC chuan member ramte hnenah hian vaccine dahṭhatna tur peihfel turin a lo nawr ṭan tawh a, hei bakah hian vaccine semchhuah hunah pawh hmanrua leh medical staff mamawh zat an awm theihna tura lo inbuatsaih lawk turin a ti a ni.
EC hian Pfizer/ BioNTech vaccine hi dose maktaduai 300 a order tawh a, hei hi Europe mipui maktaduai 150-ten an dawng thei dawn a ni. Vaccine hi -80 degree Celsius ah dahṭhat a ngai a, mi pakhatin jection vawi hnih, kar thum danah a lak a ngai dawn a ni. He vaccine hi UK leh US-ah chuan pekchhuah ṭan a ni tawh.
US FDA-in Moderna vaccine pawm
US Food and Drug Administration (FDA) advisory panel chuan emergency atan Moderna Inc siam coronavirus chu a pawm ve leh.
Panel-in Moderna vaccine chungchanga vote a laknaah hman thlawptu lamah vote 20 a tla a, hman duh loh lamah vote tu an awm lo a, vote thlak lo pakhat a awm bawk.
Vaccine hi a thawh khatna atan healthcare worker, Covid-19 kaite enkawltu leh nursing home-a awm leh thawkte pek hmasak an ni ang. August thla khan US chuan Moderna vaccine siam dose maktaduai 100 leina tur hian US dollar tluklehdingawn1.5 hu inremn a lo siampui tawh a ni.
Moderna vaccine hi chu -20 degree Celsius-ah dah ṭhat a ngai thung a, hei vang hian Pfizer/ BioNTech vaccine ai chuan a thawn kualna kawngah pawh a buaithlak lo deuh tura ngaih a ni. He vaccine pawh hi vawi hnih lak a ni a, jection lak hmasak aṭanga ni 28 hnuah lak nawn leh a ngai.