Vietnam : Khuarel chhiatna thlengin nungphung tikhaihlak

Vietnam hmar lama khuarel chhiatna, sabereka-khuangkaih leh leimin thleng chuan mipui nunphung tikhaihlakin in leh lo a tihchhiat bakah hmun tam tak kalpawh theih lohin a siam. Hei vang hian zirlai naupangte chuan zirna chhunzawm turin harsatna an tawk mek.

Vietnam hmar thlang lamah July thla aṭang khan ruah sur a tam hle a, General Statistic Office-in a tarlan danin chenna in 29,000 chuang khuarel chhiatna vang hian a chhe tawh a, thlai chinna hmun hectares 90,000 chuang tihchhiat a ni tawh bawk.

Tlawmngai pawl, Save the Children tarlan danin Son La province bikah tuilianin mi mtd 1.3 a nghawng mek a, hmasawnna ruhrel tam tak a chhe tawh bawk. Vietnam disaster thuneitute tarlan danin mi 11 nunna chan an awm tawh a, chenna in 2,670 leh school building 29-in a chhiat phah tawh bawk.

Son La province-a zirlai awmte chuan September thlaa zirna an ṭan leh hunah, khuarel chhiatna thleng avang hian an himna a la derthawng thei niin Save the Children chuan an tarlang. Nunphung pangngaia let leh tur chuan thla tam tak a ngai dawn a ni.

Vietnam-ah hian kumin January-July thleng khan khuarel chhiatna vang hian mi 91 thi emaw bo anga report an awm tawh tih General Statistic Office chuan an tarlang. Hemi hun chhunga tuilianin chhiatna a thlen vanga an bungraw hloh chu USD mtd 85 hu nia chhut a ni bawk.