Nigeria school naupang rukbote chhuah

Nigeria sorkar chuan kar liam taa an ram hmarthlang lam, Katsina state-a school naupang rukbote chu chhuah an ni tih Ningani khan a sawi. 

Kar liam ta Zirtawpni khan Kankara khuaa mipa school, Government Science School chu silai kengten an beih hnuah, zirlai 344 te chu Rugu Forest-ah an hreng zui a ni.

Katsina state governor Aminu Bello Masari chuan school naupang rukbote hi Ningani khan Zamfara state-ah chhuah an ni tih a sawi a, mahse an vaiin chhuah an ni em tih erawh sawichian a ni lo. Zirlai naupangte hi nimin khan Katsina state lam panpui nghal an ni a, an hriselna te endik sak leh phawt an ni ang. 

Kankara khuaa school beitute hi eng pawl nge tih hriat a ni mai lo a, Thawhlehni khan Boko Haram pawl hotu nia insawi audio clip tichhuakin, an pawl tih niin a sawi. Boko Haram hian ahma pawhin zirlai naupangte an lo rubo fo tawh a ni. Kankasa school an neih lai hian zirlai 800 chuang an awm a, a tam zawk chu an tlanchhe hman a, mahse 300 chuang zet chu helho hian an man a ni. 

School beih a nih a, zirlai naupangte rukbo an nih hnu hian Katsina state sorkar chuan venthawn thilah a state chhunga boarding school-te a khar tir nghal vek a ni. An ṭhenawm state, Zamfara, Jigiwa leh Kano-te pawhin school an khar ve nghal bawk.