Khawvelah hri kai maktAduai 26.4 awm
Khawvel hripui leng mek, Covid-19 kai chu mi 2,64,86,344 an awm tawh a, an zinga 1,86,74,844 chu enkawl dam ni tawhin, mi 8,73,470 in an thihpui tawh a ni.
Amnesty International chuan ram hrang hranga hripui vanga thi zingah healthcare worker 7,000 chuang an awm tih a sawi. Heng zingah hian Mexico chu medical staff thi tam berna ram a ni.
US chu hri kai tamna leh thihpui tam berna ram a la ni chhunzawm zel a, hri kai hi 63,35,244 awmin 1,91,058 an thihpui tawh. Brazil chuan US hi dawtin hri kai hmuh chhuah 40,46,150 an awm a, 1,24,729 in an thihpui tawh bawk. Anni bakah hian India, Russia, Peru, Colombia, South Africa, Mexico, Spain leh Argentina ramte chu hri kai tam zualna ram 10 zingah an tel.
New Zealand-ah thla thum
chhungin hri thihpui pakhat awm
New Zealand-ah Ningani khan Covid-19 kai pakhat, kum 50 mi a thi. Hei hi an rama thla thum chhunga hripui vanga thi hmasa ber a ni.
Health official-ten Covid-19 vanga thi hi an rama ni 102 chhung hri kai thar an awm loh hnua August thlaa Auckland-a hri kai hmuh chhuahte aṭanga kai chhawng niin an sawi. New Zealand-ah hian Covid-19 vanga thi hi mi 23 an awm tawh.
Italy PM hlui
Berlusconi-a'n Covid-19 a kai
Italy prime minister hlui Silvio Berlusconi chu Covid-19 a kai tih hriat a nih hnuin Milan damdawi-inah Ningani khan dah luh a ni a, mahse a ngaihtuahawm lo nia sawi a ni.
Kum 83 mi, Berlusconi leh a fate pahnih chu Sardinia-a chawlh an hman hnuah hri hi an kai tih hriat a ni. Ningani zan khan Milan-a San Raffaele Hospital-a isolation ward-ah dah a ni.