Democrats National Convention: Barack Obama-a'n thu a sawi

United States president hlui Barack Obama leh a nupui Michelle Obama te chu an ram huna August 20, Thawhlehni khan Democrats National Convention (DNC) ah telin thu an sawi. Barack Obama hian an party candidate, Kamala Harris chu a thlawp tih sawiin kumin inthlanah hnehna chang turin theihtawp chhuah a ngai dawn tih a sawi bawk.

US first lady hlui, Michelle Obama chuan America mipuiten beiseina an hloh tawh chu an nei let leh mek a ni tiin, Republican candidate Donald Trump chu bei zuiin thil a thlir zau tawk loh vangin anmahni chu a hlau niin a sawi.

Barack Obama pawhin Trump hi bei vein, "Kum kua liam taa a rangkachak escalator aṭanga a chhuk hnuin kan billionaire kum 78 mi hian a buaina bak sawi tur a hre lo" a ti. Trump chu Harris laka chak loh hlauah a puh bawk.

Democrats candidate, Kamala Harris hian a campaign chu ngawrh lehzualin a kalpui mek tih a hriat theih a, Democratic party-a hming lian tak pahnih, Obama-te nupa a khawrh chhuah bakah amah thlawpna thu sawi turin mi lar tak takte a sawm bawk a ni. Harris leh a vice president candidate, Tim Walz-te chuan July thlaa Republican National Convention neihna hmunah campaign rally an neih mek avangin, DND pawh hi virtual hmangin an zawm ve a ni.

2024 Democratic National Convention hi August 19 aṭang khan Chicago, Illinois-a United Center-ah neih a ni a, August 22 thleng a awh ang.

America him zawka siam duhtu Trump

Republican presidential candidate, Donald Trump pawhin inthlan lo awm tur atana campaign chu ngawrh takin a chhunzawm ve mek a, Michigan-a thu a sawinaah America him zawk siam a duh tih a sawi. Trump chuan a catchphrase lar tak 'Make America Great Again' tih chu 'Make America Safe Again' tiin a kai lek a ni.

Trump hian a khingpui Kamala Harris chuan America-ah buaina, pawikhawihna, chhiatna leh thihna a thlen dawn niin a sawi. Heng thil ṭha lote hi tun aia nasain Harris hnuaiah hian a tam dawn a chuvangin mipuite chu America him zawk siam turin ṭanrualpuiah a sawm a ni.

Trump chuan dan leh hrai kenkawh a tiam bakah mipuite tan remna leh muanna thlensak a tiam a ni. Kum li liam ta chhunga dan kenkawh dana thil ṭha an hmuh ngai loh mipuite hmuhtir tiamin naupang pawngsualtu leh traffiker-te chu thi tur hremna pek thlenga hma lak a tum thu a sawi bawk.