Vladimir Putin-a'n Chechnya a tlawh

Russia president Vladimir Putin chuan puangzar lawk loin Thawhlehni khan Eastern Europe-a Russia rorelna hnuaia awm, Chechnya a tlawh a, kum 2011 hnua a tlawh lehna hmasa ber a ni.

President Putin hi Chechen hruaitu Ramzan Kadyrov chuan ṭawiawmin, Chechen sipai leh volunteer, Ukraine do let tura inpete an endik dun a ni.

Puan lawk awm loa Putin-a'n Muslim republic a tlawh hi, kar hnih liam taa Ukraine sipaiten Russia ramri khuate an lak thu an puan hnu leh, Ukraine sipaite bei let tura Russia lamin theihtawp a chhuah lai a ni. Putin chuan Chechnya-a Gudermes-a training school, Russian Special Forces University-a sipaite hnenah, "Nangni ang sipai ṭha kan neih avang hian awlsam taka hneh mai mai theih kan nilo," tiin, ramri venhim hna huaisen taka thawk tur leh an ram bei hmasa tute chu bei let hreh lo tur te, an nunna derthawnga dah tirtute laka inveng tura huaisen taka thutlukna siam tur an nih thute a hrilh a ni.

Chechnya hruaitu Kadyrov hi kum 2007 khan Putin hian hruaitu ni turin a lo ruat tawh a, hemi hnu hian Chechen huam chhungah hian rawva takin ro a rel zui a ni. Kum 2020 leh 2022 khan, United State chuan human rights bawhchhiaa puhin a lo hrek tawh a ni. Kadyrov hian Putin nena meeting an neihah hian Chechnya chuan Ukraine bei let tur hian sipai 47,000 leh volunteer 19,000 a tirh chhuah thu Putin hi a hrilh a ni.

Putin hian Chechnya a pan hma hian North Ossetia-a Beslan khua a tlawh bawk a, hei hi kum 16 hnu vela a tlawh lehna hmasa ber a ni. He khuaa kum 2004-a Islamic helpawl ten sikul an beiha zirlai 330 zet in nunna an chan leh mi 700 chuangin hliam an tawhna kha Russian chanchin a thil thleng rapthlak tak pakhat a tling a ni.