Iran-a bus chesualah Pakistan mi 28 an thi

Iranian Students News Agency chuan August 21, Nilaini khan Pakistan khua leh tui, Iraq rama biakzinnaa kal tum mi 28-te chuan bus chesualah nunna an chan tih an tarlang. Thi bakah hliam tuar mi 23 an awm tih tarlan a ni bawk.

Pakistan mite hian Iraq-ah Shiite mithianghlim, Arbaeen hriatrengna hun hmang tura kal a ni a, Arbaeen hnungzuitute chu Karbala, Iraq-ah kumtin an pungkhawm ṭhin a ni. Hemi hun hman tum Pakistan mite chu an zinkawng, Iran-ah an chesual ta a ni.

Bus hi Thawhlehni zan khan Yazd province-ah a chesual tih emergency official Mohammad Ali Malekzadeh chuan a sawi. Bus-ah hian mi 51 an chuang nia hriat niin hliam tuar mi 23 zinga 14 chu an dinhmun a ṭha lo hle tih tarlan a ni bawk.

Iran thuneitute chuan bus chetsual chhan hi an la tarlang lo. Iran-ah hian Nilaini khan Sistan leh Baluchistan province-ah bus dang a chesual leh a, mi parukin nunna an chan bakah mi 18-in hliam an tuar.