IS video tharah naupangin an mi man a tihlum

Islamic State (IS) firfiak pawlin video a ti­chhuak thar leh a, hetah hian an mi man Mossad spy nia puh chu naupang pakhatin a tihlum lai tihlan a ni.

Video hi Thawhlehni tlai khan Twitter-ah an dah a, minute 13-a rei niin hetah hian mipa naupang, kum 12 aia upa lo ngei tura rin chuan Israeli Arab an man, Mossad spy nia insawi chu a tihlum a ni. An tihhlum hi kum 19 mi, Muhammad Said Ismail Musallam a ni a, East Jerusalem-a cheng ṭhin a ni. Tun ṭum hi IS firfiakte'n an mi man tihlum tura naupang an hmanna video an tihchhuah ṭum hnihna a ni.

Musallam hian Israel spy agency, Mossad hian enthlak hna thawk turin an chhawr niin IS online magazine, Dabiq-in a interview-naah a sawi. Firfiak pawlte hmanrua neih dan te, an hmun pawimawh leh an pawla Palestinian mi awmte hre tura an chhawr niin a sawi. Mahse a pa chuan hei hi thu dik lo a nih thu sawiin, a fapa hian ama thu ngeiin IS hi thla eng emaw zat kalta khan a zawm niin a sawi.

Thawhlehnia video tihchhuahah hian IS chuan Palestinian mite chu an harsatna tawhte an theihnghilh sak ngai lo tih an sawi a, French ṭawng hmangtu an pawl mi leh sate chu an ramah chak taka aw chhuah zel turin an fuih bawk. Israel mite chu vauin , "In him tawh lo a, tunge in nih a khawiah nge in chen tih pawh kan hria a ni," an ti.

Israel mite vauna thu an sawi hnu hian mipa naupang hian Musallam hi ṭum li a kap lai tihlan a ni. January thla khan Kazakh mipa naupangin Russia mi pahnih, en­thlatua puhte a kaphlum lai vdieo an lo tichhuak tawh bawk.