Venezuela President-in thuneihna sang zawk pe turin a dil
Venezuela President Nicolas Maduro chuan US sorkarin an ram official-te hrekna thar a siam hnuah, thuneihna sang zawk pe turin legislator-te a ngen.
National Assembly-a thu a sawiah, Maduro chuan US-in Venezuela official-te hrekna thar a siam belh chu nasa takin a sawisel a, human rights palzutna a ni, a ti.
President Maduro chuan US in a hrekna avang hian an ramin harsatna a tawh phah lohna turin 'anti-imperialize law' thar a hmang dawn tih a sawi. "US-in min dan tuma ruahmanna engpawh a siam laka inveng a, harsatna kan tawh lohna turin kan inbuatsaih thei a ni," tiin a sawi.
Legislator-te hnena thuneihna sang zawk pe tura a dil rual hian, eng ang thuneihna tih leh, eng angin nge a hman dawn tih erawh a sawi chiang lo.
US-in an ram a khawih lohna turin sipaite chuan Inrinni hian Venezuela ram chhung an endik kual dawn tih President chuan a sawi bawk.
Hetihlai hian eptute chuan President-in thuneihna sang zawk pe tura a dilna chu sawiselin, politics lama a hmelmate tihchhiatna atan a hmang ngei dawn tih an sawi thung. Eptu hruaitu eng emaw zat chuan thuneihna pekbelh hmang hian kumin kumtawp lama inthlan neih tur result pawh a duh dan angin a siam thei dawn niin an sawi bawk.
Nikuma Venezuela sorkar laka lungawi lohna lantirtu, eptute beih let an nih danah US chuan official eng emaw zat chu mawhphurtua puhin hrekna thar a siam a, US visa pek khap an nih dawn bakah, US-a an thil neihte pawh khawih chet theih loha dah tura tih a ni.