Hong Kong security law Ngaihtuah ṭha turin China ngen

United Nations-a human right expert-te chuan Hong Kong security law chu sawiselin, China hnenah he dan siam thar hi ngaihtuah ṭha tura ngenna an thawn. 

June 30 khan China Parliament-in Hong Kong security law hi a pawm a, July 1 aṭang khan hman ṭan a ni. He dan siam thar hi ram hrang hrangin an sawisel a, UN chuan human rights dan kalh a nih thu leh mimal zalenna rahbehna a nih avangin China chu ngaihtuah ṭha leh tura ngenin lehkha a thawn ta a ni.

Fionnuala Ni Aolain kaihhruai UN-a rapporteur pasarih chuan kar liam ta Zirtawpni khan human rights leh fundamental freedom humhimna chungchangah thuchhuah an siam a, mitinin freedom of expresson an neih thu leh, he an dikna an lanchhuah tir hi thiam loh chantir ngawtna tur a ni lo tih an sawi a ni. Miin a ngaihdan a sawi chhuak thei a, midang ti buai lo zawng pawhin pawlte chuan pungkhawm thei tura zalenna an nei a ni, tiin rapporteur-te chuan an tarlang bawk. 

Hengte avang hian Hong Kong security law thar hman tak chuan international law a kalh a ni an ti a, ngaihtuah ṭha leh turin China an ngen ta a ni.

July 1, 2020 aṭanga hman ṭan, Hong Kong national security law-ah hian sorkar laka inlakhran duhna, sorkar beih tumna, sorkar laka a hel zawnga chetna leh ram dang sipai emaw pawl emaw thawhpui tumna kawnga chete chu thiam loh chantir theih an ni. An thil tihsual a nasat dan a zirin kum 10 bakah dam chhung hial pawh lungin tantir theih a ni. 

Sorkar laka hel avanga punkhawmna te, ngaihdan sawina te leh a hel zawnga chetna zawng zawng chu he Hong Kong security law hian a khap vek a ni. UN bakah ram hrang hrangte pawn China chungah hian an lungawi lohna vawi tam an lo lantir tawh bawk a ni.