Bahrain-in Israel-UAE flight tan an ram boruak hman phalsak

Bahrain chuan Israel leh United Arab Emirates (UAE) in direct flight an siamah heng thlawhtheihnate hi an ram boruakah an thlawh a phalsak dawn tih a sawi a, hemi hma hian Saudi Arabia pawhin a phalsak thu a lo sawi tawh bawk. 

Israel leh UAE hian inzawmna siam an remtih hnuah a ṭum khatna atan Thawh-ṭanni khan ram pahnih inkarah commercial flight hmasa ber a thlawh tir a ni. He thlawhtheihna hi Tel Aviv aṭanga thlawk chhuakin, Saudi Arabia ram chungah thlawkin UAE-ah a thlawk lut a ni. Saudi Arabia chuan Israel chauh ni lo, ram dangte pawh an ram boruakah an thlawh a remtih vek thu a sawi. 

Hetih lai hian UAE leh Israel-in inzawmna siam an remti hi Iran chuan na takin a sawisel a, Arab ram leh Palestinian mite phatsanah UAE chu a puh hial.