UK : Raltlante dang turin hma lak a ni dawn
United Kingdom sorkar chuan ramchhunga dan loa lutte dang tur leh inhumhimna zawnga tlanchhia, raltlante thawnkir turin hma an la dawn. UK-ah hian ram dang aṭanga pem lutte duh lohna lantirna July thla tawp aṭang khan neih niin, ramchhung a buai phah hle a ni.
UK Interior Ministry chuan Nilaini khan thuchhuah siamin, National Crime Agency (NCA) hnuaia thawk tur, “specialist intelligence and investigation officers” mi 100 lak belh an ni dawn a, heng mite hian tuipui aṭanga pem lutte dan chah hna an thawk dawn tih a puang.
Inhumhimna zawnga UK-a tlanchhia, kum nga chhung awm tawh hnua phalna la hmu lote chu thla ruk chhungin a tam thei ang ber an ram lama thawn kir an ni dawn tih ministry chuan a tarlang bawk.
Labour party kaihhruai sorkar thar chuan removal centers a mi dah theih zat tihpun an tum bakah UK a hnathawh phalna nei lo chhawrtute chu hrem an ni dawn tih a sawi. Interior minister Yvette Cooper chuan, "Ramri venghim turin ṭan kan la a, dan zawm leh kenkawh a nih theih nan hma kan la bawk" a ti.
July thlaa UK inthlan neih a nih hma khan ramchhunga dan loa pem lutte thawn kir tura duhna a lian hle a, hemi hnu hian UK-a cheng ramdang mi chu naupang pathum thattua puh niin dan loa pem luh titawp turin mipuiten sorkar an nawr zui a, UK chhungah buaina a chhuak nasa hle a ni.