Trump-a'n beihna a tawh hnua outdoor rally hmasa ber nei

US President thlanna neih tura Republican candidate, Donald Trump chuan thla liam taa thah tuma kah a nih hnua pawn lama rally a neih lehna hmasa ber chu North Carolina-ah a nei. Trump hian campaign laia beih a tawh hnuah amah venhimna hi uluk lehzuala kalpui a ni.

Trump-a rally neihna hmun hual hian container lian tak tak dah niin, heng hi hmun dang aṭanga amah hmuh theih loh nan leh indaidanna atana tih a ni. Hemi bakah hian inchung lamah sniper-te chuan uluk takin Trump hi an veng a, dawhsana thu sawina tura chu bulletproof glass hmanga hung a ni bawk.

North Carolina-a thu a sawinaah Trump hian hnehna an chang ngei dawn tih sawiin, "Ni 76 hnuah he state-ah hian hnehna kan chang anga, White House lut turin hnehna kan chang bawk ang" tiin inringtawk takin a sawi. Trump hi a vice president candidate JD Vance chuan a ṭawiawm a ni.

Kum 2016 inthlan khan Trump hian North Carolina-ah hnehna a chang a, a khingpui a hnehna pawh a sang thawkhat hle. Kum 2020-ah erawh hnehna chang mah se a khingpui nen an inthlauhna a sang lo hle a, kumin inthlanah pawh Harris nen an inkhin tawk hle rin a ni.