China-in Taiwan awp a tumna a tawpsan dawn lo : Taiwan President

Chinese Communist Party official pakhatin Taiwan nena ram pakhat an nih leh theih ngei a rin thu a sawi hnuah Taiwan President, Lai Ching-te chuan Taiwan awp tumna chu China chuan a tawpsan dawn lo tih a sawi.

Lai Ching-te chuan Taiwan laka China inluling ṭhin chu a tawp mai dawn lo tih sawiin, democracy ramte chuan ṭangruala China-in a ram chin zauh a tumna chu do let puiah a sawm.

Taiwan President hian China chuan Taiwan chauh a bitum lo tih a sawi bakah, China chu khawvel inrelbawl dan thlak tumah a puh bawk. Hemi vang hian democracy zawmtu ramte chu an ṭanrual a ngai a, chuti a nih loh chuan China ram lak tumna chu an do hneh dawn lo a ni, a ti.

Taiwan sipaite hian tun hnaiah an ram tuipui chinah China indo lawng an lut ṭhin tih an lo tarlang tawh bawk. Hemi bakah Taiwan thliarkar chhehvel thlithlai turin China chuan jet fighters leh drone an tir ṭhin tih an tarlang bawk a ni.

China chuan a ram ṭhenawmte tih thlabar nan South China Sea, Western Pacific leh Sea of Japan-ahte indo nunchan an zir ṭhin thu Lai Ching-te chuan a sawi a, mahse Taiwan chuan a hlauh phah lo tih sawiin Taiwan Strait a remna a awm theih nan ṭan an la zel dawn a ni, a ti.