Sheikh Hasina leh a thurualpuite lakah thubuai ziah luh belh

Bangladesh prime minister hlui Sheikh Hasina leh a thurualpuite lakah Thawhlehni khan thubuai pakua hi ziah luh belh leh a ni. Hasina laka thubuai thehluh hi 31 a tling tawh a, heng zinga 26 chu mi thah thubuai niin, pali chu humanity bawhchhiatna leh insuatna kaihhnawih niin, pakhat chu mi rukbo thubuai a ni ve thung.

Supreme Court Lawyer Gazi MH Tamim chuan Hefajat-e-Islam a joint secretary general (education and law) Mufti Harun Ijahar Chowdhury aiawhin thubuai hi Bangladesh-a International Crimes Tribunal-ah a thehlut. Hasina leh a thurualpuite hian May 5, 2013-a Hefajat-e-Islam rally neihnaah khan pawikhawihna lian tak an thlen niin an puh.

Prime Minister hlui, August 5-a India a sahimna zawng a tlanchhia, Hasina lakah hian International Crimes Tribunal-ah thubuai pali an thehluhna chiah a ni. Heng thubuai pali zinga pathum hi tun hnaia "quota reform movement" neih vanga buaina chhuak kaihhnawih vanga theh luh te an ni. Awami League Chairperson lakah hian Thawhlehni khan ramchhung hmun hrang hrangah thubuai pariat ngawt ziah luh a ni.