Iraq sipaite'n IS kuta awm, Tikrit khawpui an luhchilh
Iraq sipaite leh anmahni puitu, Shiite fighter-te chuan Islamic State (IS) firfiak pawl kuta awm mek, Tikrit khawpui chu lak let tumin Nilaini khan an luhchilh.
Iraq sipaite hian Tikrit khawpui hi a hmarlama Qadisiyya aṭangin an lut a, thuneitute'n sipai tam zawk thawn luhna tur kawng an siam zui nghal a ni.
Sipaite'n khawpui chhung an luh hnu hian firfiakte hian civil mite car man sakin, khawpui aṭangin an tlanchhuak a ni. Mahse an tlanchhuah hma hian chilpuah bomb eng emaw zat an kam nia sawi a ni.
IS firfiakte hian Iraq ram hmun thuma ṭhena hmun khat an la tawh a, hei bakah hian ramri bul hnaia Syria ram eng emaw zat an la tawh bawk.
Salahuddin province khawpui, Tikrit hi Baghdad hmarlam km 130-a hlaa awm a ni a, IS firfiakte'n khawpui lian an lak tawh zinga pakhat a ni, Baghdad leh Mosul inkalpawhna kawng pawimawh bula awm a ni. He khua an lak let theih chuan Iraq sipaite tan Mosul khawpui la let tura an beihnaah a ṭangkai phah dawn hle a ni.
US sipai official-te chuan firfiakte kuta awm mek, Iraq ram khawpui lian ber dawttu, Mosul khua la let tura beihna chu April-May thla vel hian ruahmanna fel tak hnuaiah kalpui theih a ni dawn tih an sawi a, he inbeihna hi Iraq sipai 25,000 velin an hmachhawn dawn a ni. Hemi rual hian Iraq sipaite hi an inpeih fel hman lo a nih chuan beihpui thlak hun hi tihkhawtlai theih a nih tih an sawi nghal bawk.
Iraq sipaite hi tank leh ralthuam phur motor te'n an zui bakah, thlawhtheihna hmanga puih an ni a, reiloteah Tikrit khawpui hi firfiakte kut aṭang hian an lak fel theih beisei a ni.