Myanmar zirlai nawrh huaihawtte thubuai siamsak
Myanmar sorkarin education law a siam thar duh lo a, he dan siamṭhat phuta nawrh huaihawt zirlai man zinga ṭhenkhat chu chhuah ni mah se, eng emaw chu hren zui niin thubuai siamsak an ni.
Zirlai la hrente hi nunphung tibuai zawnga chea puhin thubuai siamsak an ni a, thiam loh chantir an nih chuan kum nih lung-in tantir theih an ni ang.
Thawhlehni khan Yangon-ah zirlaite leh police-te hi an innawr buai a, police-te chuan tiang nen zirlaite hi beiin an zinga 60 vel chu truck-ah phurin an hreng zui a ni. Hei bakah hian Letpadan-a nawrh huaihawt zirlai 127 te chu man an ni bawk.
United States, European Union leh Britain-te chuan police te'n tharum hmanga zirlai nawrh huaihawtte an bei chu an dem thu an sawi. Human rights group leh activist hrang hrangte pawhin sorkar thiltih dan hi an sawisel bawk.
Hetihlai hian Information Minister Ye Htut chuan police-te thlavang hi hauhin, boruak tichhe thei zawnga nawrh huaihawtte titawp turin police-te chuan dan anga chet theihna an nei a ni, a ti. He thil thleng vang hian an rama democracy tundin tuma an beihna chu a bahlah phah dawn lo tih a sawi.
Minister chuan, "Boruak ṭha tak hnuaia inbiakna neihpui rawt an nih hnuah pawh zirlaite hian police-te chu paltlang luih an tum a, hei vang hian police-te chuan lo dan a, an hnawtdarh a ngai a ni," a ti.