Hriselna ṭhat tawk loh vangin Japan PM a bâng dawn

Japan prime minister Shinzo Abe chuan nimin chawhma lam khan a hriselna ṭhat loh avangin PM a nihna aṭanga a ban tur thu a puang. 

Kum 65 mi, Shinzo Abe hian rorellai Liberal Demo­cratic Party emergency meeting-ah ban a tum thu hi a puang a, party hruaitute pawh a ṭhawng hle. Hemi hnu hian Abe hian press conference neiin, a hriselna a ṭhat tawk loh avangin ram hruaitu hna chawlhsan a tum thu hi a sawi leh a ni. 

Abe chuan ril pan (ulcerative colitis) natna a neih thu sawiin, regular taka enkawl a ngai a, hei vang hian ram hruaitu dinhmun chelh chhunzawm zel tur chuan hun a ngah thei dawn lo tih a sawi. "Mipuiten min beisei angin ka hnate hi ka thawk ṭha thei dawn lo a, hei vang hian prime minister dinhmun chelh chhunzawm thei ka ni lo a ni," a ti. A term hmang zo tura kum khat chauh hun a awm tawh leh, an rama hripui len mek lai te, a policy hrang hrangte tipuitlin tuma hma lak mek a nih laia ban a ngai chu pawi a tih thu sawiin, Japan mipuite ngaihdamna a dil nghal thu a sawi. 

Liberal Democratic Party-in a thlaktu tur hi an thlan fel hma chu Abe hian PM dinhmun hi a la chelh chhunzawm rih ang. A thlaktu tura rin kai zingah finance minister Taro Aso leh chief cabinet secre­tary Yoshihide Suga te an tel.  Abe hi tunhnaiah a hrisel­na a ṭha lo zual a, dam­dawiin pawh a kal fo nia sawi a ni. Thawhṭanni pawh khan Tokyo-a Keio University Hospital-ah a in entir a ni. Kum 2007 khan a hriselna ṭhat loh avangin PM a nih laiin a lo bang tawh bawk. Kum 2012 khan PM atan thlan tlin leh niin, Japan rama a zawna PM dinhmun chelh rei thei ber a ni.