Paris-ah mask vuah vek turin thupek

France khawpui, Paris-ah chuan nimin aṭang khan pawn chhuakte chu hmai tuamna, face mask hmang ngei ngei tura tih an ni. 

Prime minister Jean Castex chuan Ningani khan tualchhung thuneitu hrang hrangte chu Covid-19 darh zel tur venna atan leh, hripui leng vanga ram puma lockdown kalpui a ngaih tawh lohna turin khuahkhirhna te siam thar leh turin a ti a ni. Castex chuan hri kai an awm thar reng a, hei vang hian theihtawpin hri darh tur venna atana an inpek a ngaih thu a sawi. 

Prime Minister in ngenna a siam hnuah, Paris police head­quarters chuan nimin aṭanga hman turin zing dar 8 aṭangin pawn chhuakte chu mask vuah vek tura hriattirna a tichhuak a,  hei hian cyclist leh open-air transport hmangtute pawh a huam. Mahse car chhunga chuangte erawh a huam tel lo thung. 

France rama hri leng hian May leh June khan ziaawm lam a pan tawh a, mahse July thlaa sorkarin test a neih tam leh hnuah hri kai hmuh chhuah hi an pung chho leh a ni. Ningani khan hri kai hmuh thar 6,000 chuang an awm leh a, hei hi May thla hnua ni khata hri kai hmuh thar tam ber ni a ni. Hri leng vanga khuah­khirhna te siam thar leh ni mah se, sorkar chuan kar leh aṭanga school hawn a tum chu kal tlangpui a tum tho a ni.