Zawlnei Mohammed cartoon vangin zirtirtu that France mipuiten zirtirtute thlawpna lantir

France rama zirtirtu, Samuel Patty chu a zirlai naupangte hnenah Zawlnei Mohammed cartoon a entir avangin kar liam ta Zirtawpni khan Islamist firfiak nia hriat pakhatin thatin a lu a tansak. Tualthahna duh lohna leh, zirtirtute an thlawpna leh freedom of expression humhalhna lantirin Pathianni khan France ram khawpui hrang hranga mipui an pungkhawm. 

Paris khawpui bakah khawpui lian dang  Lyon, Toulouse, Strasbourg, Nantes, Marseille, Lille leh Bordeaux-ahte nawrh hi huaihawt a ni a, Paris-a Place de la Republique-a punkhawmnaah prime minister Jean Castex pawh a tel. 

Kum 47 mi, Samuel Patty hian tun thla tir lam khan a zirlaite hnenah freedom of speech chungchang a zirtirnaah zawlnei Mohammad cartoon a entir a, hei hi Muslim tam takin an sawisel zui. 

Muslim chuan zawlnei Mohammad lem siam danglam hi sakhaw sawi­chhiatna angah an ngai a ni. He thil thleng vang hian kar liam ta Zirtawpni khan Patty hi Paris khaw daia an school pawnah kum 18 mi, Islamist firfiak nia hriat Abdoulakh A chuan beiin a that zui ta a ni. 

Patty thattu hi Russia rama Chechen mi nia sawi a ni a, a pawi khawih hnuah hian police-te chuan an kap hlum zui ve nghal a ni. Tualthahna kaihhnawihah hian police-te chuan mi 11 an man tawh bawk. 

Khawpui hrang hranga pung­khawmte chuan zirtirtute an thlawpna thuziak,  "Je suis enseignant" (I am a teacher) tihte an keng a,  mitinin free­dom of expression an neih thu leh, France ram chu sakhaw tin zalenna ram a ni tih an sawi. 

Kum nga liam taa zawlnei Mohammed cartoon tihchhuah avanga Islamist firfiakten  Charlie Hebdo magazine office an beih chungchangte pawh an sawi chhuak leh bawk a ni. 

Education minister Jean-Michel Blanquer chuan mipuite an  inlungrual chuan France ram chuan democracy hmelmate chu a hneh zel dawn a ni tiin, France rama zirtirtute chuan thlawpna an mamawh thu a sawi. 

France rama Muslim leh imams pawl hrang hrang pawhin zirtirtu thah a ni hi an dem thu sawiin, sakhaw hminga pawi­­khawihna rapthlak tak thlen chu an pawm ngai lo tih an sawi a ni. 

Khawvela Muslim pawl lian ber, ram 57 telna Organization of Islamic Cooperation pawhin rawng taka Samuel Patty thah a ni chu an dem thu sawiin, eng behchhan pawh ni se firfiaka chetna reng reng chu an pawm loin, an dem tak zet tih an sawi.  

Nilaini hian France ram pumah Patty sunna hi neih a ni ang.