Bangladesh-in PM hlui Hasina diplomatic passport tih tawp sak

Bangladesh-a zirlai pawlin a rorel dana lungawi lohna an lantir hnu lawk a sahimna tur zawng a tlanchhe ta, prime minister hlui Sheikh Hasina-i diplomatic passport chu Bangladesh-a sawrkar lailawk chuan a tih tawp sak.

Interior Ministry in an thuchhuahah Hasina leh a kaihhruai sorkar hnuaia minister leh law-makers lo ni ṭhin zawng zawngte chu an passport tih tawp sak a ngaih thu a tarlang. Sorkar paih thlak taka prime minister, adviser leh cabinet minister te hian diplomatic passport chu an post chelh kaltlangin anmahni leh an kawppuite huamin an nei thei a, mahse an dinhmun aṭanga paih thlak emaw an chawl emaw a nih chuan an diplomatic passport hi tih tawp ngei ngei tur a nih thu an tarlang a ni.

Hasina leh a kaihhruaina hnuaia mi pawimawh zualte chuan passport pangngai chu an dil leh thei a, mahse an document te chu pawmsak loh theih an ni, tiin thuneitute chuan an sawi. "Sorkar paihthlak taka hruaitute hian passport thar an dilna hi midang dilna ang thoin 'security agency' pahnihte phalna leh pawmpuina an paltlang phawt a ngai a, chumi hnuah pek chhuah theih a ni ang," tiin Ministry chuan a tarlang.

Hasina-in kum 15 chhung Bangladesh-a thuneihna a chelh chhung hian a thuneihna hmang sual leh, politics lama an khingpuite laka hleilenna nasa tak thlentira puh a ni. Sorkarin quota policy a siam thar duh lohna lantira nawrh huaihawt a nih hnuah tualchhungah buaina chhuakin, mi 450 chuang an thi. Thi zinga ṭhenkhat chu police-te silai hmehpuaha thi nia sawi an ni. Ningani khan nawrh huaihawt chhung hian mihring dikna chanvo palzut a ni em tih chhuichiang turin United Nations team chuan Bangladesh an thleng a ni.